Ардчилалд суурилсан хамтын ажиллагааг өргөжүүлэх намын зорилтын хүрээнд БНСУ-аас Монгол Улсад суугаа Онц бөгөөд Бүрэн эрхт Элчин сайд Чой Жин Вон, Элчин сайдын зөвлөх Кан Хёон Чол нартай Ардчилсан намын Ерөнхий нарийн бичгийн дарга Н.Ганибал, Сургалт судалгаа, гадаад харилцаа хариуцсан газрын дарга Б.Батцэрэн нар өнөөдөр албан уулзалт хийлээ.
Уулзалтын үеэр Ардчилсан намын Ерөнхий нарийн бичгийн дарга Н.Ганибал Ардчиллын нийтлэг үнэт зүйлсэд тулгуурлан бүс нутаг, дэлхийн улс орнуудын улс төрийн намуудтай Ардчилсан нам хамтран ажиллаж, харилцан туршлага солилцохыг чухалчилж байгааг онцолсон юм.
Түүнчлэн энэхүү хамтын ажиллагаа нь зөвхөн улс төрийн ойлголцлоор хязгаарлагдахгүй. Сонгуулийн үйл явцын ил тод байдал, намын институтийн хөгжил, залуусын оролцоо, цахим шийдэл, ардчиллын тогтолцооны чадавхыг сайжруулах зэрэг олон чиглэлд бодит хувь нэмэр оруулж байгаад итгэлтэй байна хэмээгээд бид ардчиллын үнэт зүйлсийг хамгаалах, хөгжүүлэхийн төлөө нээлттэй, уялдаа холбоотой, үр дүнтэй хамтын ажиллагааг үргэлжлүүлэн дэмжих болно гэлээ.